Red Ribbon Week

Red ribbon week, miho conoci como Siman di bisti cinta cora ta un campaña di prevencion y conscientisacion relaciona cu alcohol, tabaco, otro droganan y violencia. E campaña aki ta ser efectua cada aña den luna di october fecha 23 te cu 31 mundialmente. F.A.D.A. tin mas cu 20 aña ta forma parti di e Red Ribbon Week. Tur aña na merca ta saca un ganador di e miho lema y esaki ta wordo uza mundialmente pa representa e siman aki.

Historia di siman di bisti cinta cora

E Siman Di Cinta Cora a cuminsa despues di e secuestro, tortura y asesinato brutal di un funcionario di DEA, Enrique” Kiki” Camarena na 1985. E agente Camarena tabata trahando secretamente na Guadalajara, Mexico pa 4 aña. E esfuersonan di Camarena a hiba na un pista cu a resulta den e descubrimento di un operacion multimiyonario di fabricacion di droga na Chihuahua, Mexico. Como resultado nan a asesina varios informantenan importante y despues ariba 7 di februari 1985, nan a secuestra Camarena y su piloto. Algun dia despues e curpanan sin bida di agente Camarena y su piloto a ser haya banda di caminda cerca di un rancho na Angostura. E investigacion di DEA a revela cu Camarena a ser tortura extensivamente prome cu e la wordo asesina. Despues cu Camarena a ser haya morto, habitantenan di Calexico, ciudad natal di Camarena, a cuminsa bisti cintanan cora na su honor. E cinta cora a bira nan simbolo pa prevencion y educacion cu e meta pa reduci e demanda di droganan ilegal. Door di bistimento di e cinta cora ta ser demostra e desaprobacion contra uzo di droga. E no ta solamente un homenahe na Kiki Camarena pero tambe na tur hende homber y hende muher cu a haci e maximo sacrificio di sostene e guera contra narcotrafico. E celebracion di e Siman Di Cinta Cora cu ta tuma luga den e ultimo siman di october, awendia ta trece miyones di hende hunto pa conscientisacion di e peligernan di alcohol, tabaco y otro droganan y tambe encurasha prevencion, intervencion na tempo y tratamento.

Siman di bisti na locura

Na aña 2012 e team di F.A.D.A. a organisa un evento pa comunidad di Aruba cu a haya e nomber di Siman Di Bisti na Locura. E meta ta pa di un forma creativo, diferente y simpel demostra cu bo tambe ta contra e uzo y abuso di tur clase di droga. E siman aki e reto ta di bisti algo cu normalmente no lo bisti. Algun ehempel ta; bisti un paña cora, meanan colorido of no usual, un petchi of sombre, piyama. Tur aña e team di F.A.D.A. ta haci cambionan na e siman pa asina e por ta diferente constantemente. E campaña aki ta un ‘social media event’ y esey ta nifica cu ta participa door di saca un potret di bo persona of bo grupo y comparti esaki cu cu nos via nos pagina di facebook. Tur hende por forma parti di esaki, for di esnan mas chikito te na adulto, scolnan y tambe companianan. Como un aprecio y danki na e comunidad pa duna sosten na siman di cinta cora como tambe na e siman di bisti na locura, F.A.D.A. ta otorga premionan atractivo pa diferente categoria den e siman aki.