Historia di F.A.D.A.

F.A.D.A. (Fundacion Anti Droga Aruba) a wordo funda 16 di oktober na aña 1984 pa un grupo di mayornan hopi preocupa cu e situacion peligroso e tempo ey caba y a tuma e iniciativa di cuminsa cu un fundacion pa asina preveni uzo y abuso di droga ariba nos isla. E mayornan aki a haya cu tin mester di un fundacion cu por informa y conscientisa e pueblo di Aruba y sigur e hobennan tocante e problemanan cu uzo y abuso di droga ta trece cune. Uzo di droga ta un problema mundialmente creciente y un menasa grandi pa e isla di Aruba tambe. Na Aruba e problematica di alcohol y droganan ilegal ta un problema serio y cu ta bin dilanti  hopi entre hoben y tambe adulto. No tin un edad specifico cu hoben nan ta cuminsa experimenta y uza sea droga of alcohol. Esaki ta e motibo cu Fundacion Anti Droga ta y lo sigui traha pa pueblo di Aruba pa asina semper pueblo ta bon informa y cu e informacion ta yega serca nos hobennan ya desde un edad relativamente hoben pa asina nan por tuma e decision corecto ora yega na e topico di droga y alcohol.

Recientemente Fundacion Anti Droga Aruba a celebra su 35 aniversario como fundacion aki na Aruba y nos ta premira hopi mas aña pa asina brinda pueblo di Aruba nos servicio preventivo.