Informacion di Video Gaming

Adiccion na Video Gaming

Ora nos tende e nomber adiccion, nos ta pensa mesora of semper riba droga of alcohol pero e realidad ta cu tin un gran cantidad di adiccion. Prome cu tur cos nos mester analisa e nificacion di e palabra adiccion.

 

Adiccion ta wordo defeni como lo siguiente:
– Depedencia fisico y psicologico di substancia cu ta altera e kimica di celebro.
– Un continuo envolvimiento cu un substancia of un obheto of actividad, apesar di concecuencianan negative asocia cune.

Adiccion na wega nan di video of video games ta na momento cu un persona ta sinti su mes forsa of pusha door di su mes pa uza e computer den un forma excesivo y caminda cu e computer of video games ta strobe den su bida diario y sigur den su trabou, relacion familiar of studio.
Un video game por ta un nintendo, playstation, psp, X-box of weganan riba computer of telefon celular. E adiccion na video games por tuma un rumbo asina drastico, caminda personanan por isola nan mes completamente for di familiarnan, amistadnan of otro contacto-of actividadnan social. E adiccion aki por ser compara cu adiccion na gablemento y casino.

 

Kico bo ta sinti?

Ora un persona ta hunga video games, e tin e posibilidad di gana of perde. Ora un persona gana, e ta dune e sintimento di recompense y e sentimento aki ta pone un persona sinti bon y e ta stimula pa e persona bolbe hunga. E sintimento di recomensa aki ta produci dopamine y endorfine den bo celebro. Bo curpa ta reconose e sintimento di recompensa aki y ta bai exihi cada biaha pa mas y esaki ta ora cu e por bira un adiccion.

 

Posibel sintomanan di adiccion na Video Gaming

  •  Algun hungado adicto ta preocupa mas cu nan interaccion den e wega cu e relacion cu nan famianan of otro personanan.
  •  Hopi ora di hungamento y lagando e bañamento pa oranan laat di anochi y tambe considerando limpiesa personal como perdida.
  • Perdida of subimento di peso excesivo door di oranan largo di hungamento.
  • Sistema di drumi for di ordo.
  • Hungamento na trabou
  •  E hungado adictivo ta evita yamadanan di telefon di amigo(a)nan.
  • Gañamento tocante duracion di participacion na e weganan
  • Posibel causa di adiccion
  • Satisfaccion di necesidadnan psicologico
  • Necesidad di recompense cada biaha
  • Sentiment di libertad
  • Coneccion cu otro hungadonan
  • Satisfaccion cu no por ser haya den e mundo real.

Efecto di Video Gaming

Adiccion na weganan di video por resulta den problema nan personal, familiar, academico, financiero y problema nan den trabou. Tur esakinan ta caracteristicanan di otro tipo di adiccion tambe. E uzo excesivo di video games por afecta relacionnan den bida real. Esnan cu ta sufri di adiccion na video games ta pasa mas tempo nan so y ta dedica menos tempo cu hende real den nan bida y mayoria biaha nan ta wordo mira como hendenan socialmente straño.
Argumentonan por ta resultado di e cantidad di tempo cu e persona ta dedica na hunga weganan di video. E persona por ganja cu e intencion pa tapa con hopi tempo e ta dedica na wega nan di video. Adicional “gaming” por bira hopi costoso y por afecta e parti financiero di e hungado. E aparatonan cu ta wordo uza pa hunga video games hopi biaha ta costa basta placa y tin wega cu ta cobra un suma mensual pa por hunga.

PSICOLOGICO
Un hungado por crea ‘online personas’ of avatar cu e ta identifica su mes cune. Cu e avatar aki e por altera su identidad of pretende di ta un persona full diferente cu su mes. Esnan cu ta core mas riesgo di crea un bida secreto ta persona nan cu un autoestima abou, cu ta pensa cu nan no tin balor of cu tin miedo di no wordo acepta door di otro hende. E sentimentonan negativo aki por crea deprecion y ansiedad. Hopi hende cu kier purba stop di hunga weganan di video ta experencia sintomanan di retiro manera: malebeis, deprecion, Alivio, fantacia di e wega, cambio di sentido di humor, ansiedad, miedo, tristeza, soledad, inkietud, malo di stoma, etc. Bo por yega na un punto cu bo ta sinti cu bo no por biba sin e wega, bo persona por perde trabou, famia, placa, amistad. y esaki por hiba bon a e punto unda cu bo ta sinti bo mes completamente bo so, te na e punto cu bo por comete suicidio.

FISICO
Adiccion na video games por causa malestar fisico of problema medico manera: wowo seco, dolor di lomba, dolor di cabes, iregularidad den comemento, problema cu drumimento y hygiene ta bai atras. Video gaming tambe ta rekeri e uzo repetitivo di movimiento di bo man y pols. Esaki por conduci na e syndrome di carpal tunnel. Tin persona nan ta pasa oras hungando video games unda cu nan ta lubida di come, baña, bebe awa, y ta keda tras di un machines pa dias nan largo. Esaki por conduci na morto diripiente.

 

Riesgo

Emocional:
Persona nan cu ta luchando cu e adiccion di wega electronico tin un chens hopi grandi di cay den deprecion, soledad, rabia, y infelis. Aumento den un comportacion di agresividad y comportacion social ta bai atras. Bo felisidad ta depende di e wega

Financiero:
Bo ta inverti un gran cantidad di placa den e video games pa asina purba avansa den e wega. Muchanan y hobennan por yega na e punto cu ta prefera di inverti placa den e wega enbes di cumpra cosnan necesario, por yega na e punto cu e mucha/hoben por horta credit card di su mayornan pa asina pone placa den e wega.

Estudio:
Mucha nan por tin e consequencia unda cu nan lo por cay atras den nan studio. No tin interes mas den scol y nan ta content si nan pasa nan materia nan net net.

Trabou:
Persona nan por core e riesgo y yega punto cu no tin motivacion mas pa traha unda cu e presentacion na trabou ta baha y asina por yega na wordo kita di trabou.

Social:
Uzo di video gaming por ocaciona cu un persona ta prefera di pasa su tempo hungando cu pasa tempo cu famia of amistad. E por yega na e punto cu e no ta wak e necesidad di tin amistad como cu tur su amistad nan ta online. Ki nan e persona ta cuminsa isola su mes di tur cos y asina por cuminsa experencia soledad y deprecion. Persona nan cu tin famia por cuminsa neglisha esaki y laga obligacion y responsabilidad nan un banda.

Familiar:
Esaki ta e riesgo di mas grandi cu un persona cu ta haci uzo exsecivo di video games por confronta su mes. Esaki por bira un conflicto unda cu familiar nan preocupa y concerni ta bira un estorbo pa e hungado unda cu esaki por hibe na haya rabia y ocasiona abuso verbal y fisico ora un familiar purba pone limite of un stop na e uzo di video gaming. Esaki por yega asina leuw cu un persona por comoete homicidio.

 

Influencia riba bo desaroyo personal

Video gaming por tin un influencia grandi riba bo desaroyo personal.
Esaki por pone bo bira un persona asocial, unda cu bo interes nan diario ta bai y unda cu bo tin menso interes pa haci actividad nan cu normal bo ta haci. E por influencia bo di tal manera e por afecta bo personalidad. Tin un persona trankilo bo por bira un persona agresivo dependiendo di e tipo di wega cu bo persona ta uza.

 

Dependencia

Un persona por bira dependiente na video games. Na momento cu e ta pasa mas y mas tempo hungando, invertiendo mas y mas placa den e wega of si e ta haya su felisidad den e wega y no ta pensa di nada otro cu ta e wega, e por core riesgo na bira un adicto na video gaming.