Piedra – FADA

Kico ta piedra / base-crack?

Crack (Piedra) of base-coke/cocaina cushina ta un forma procesa di cocaina. E operacion aki ta necesario pa haci e cocaina den tal forma cu por huma esaki.
E proceso ta tuma lugar door di disolve puiro di cocaine den un base sterki/fuerte manera bicarbonato di sodio (sodium) of amonia y cushina esaki. Esaki ta crea un bulto cu por wordo huma via un pipa.

Crack (Piedra)
Tiki awa y hopi bicarbonato di sodium ta forma crack. E bulto ta consisti di base di cocaina, bicarbonato di sodium y su ‘cuts’ nan original. Ora di huma esaki ta saca un zonido cu ta ‘kraak’ pa es motibo e nomber di ‘crack’

Base/cocaina cushina
Hopi awa y tiki bicarbonato di sodium ta crea basecoke. Den otro palabra basecoke ta mas ‘puro’ cu crack (piedra) paso esaki no tin ningun impuresa. E ta puro base di cocaina.
Tene cuenta cu esaki no ta nifica cu basecoke of cocaina cushina ta mas saludabel cu crack. Basecoke of cocaina cushina ta un base di cocaina mas puro compara cu crack ‘piedra’.

E manera di uzo

‘Chinezen’:
E crack (piedra) ta wordo poni ariba un pida aluminiun y keinta cu un lighter, y ta inhala e vapor di esaki.

Huma:
Base-Crack (Piedra) ta wordo huma via pipa di awa of pipa di base (basepipe)

Kico bo ta sinti?

EFECTO FISICO:

Temperatura di curpa halto
Palpitacion mas duro
Pupilnan grandi
Sed
Tos
Curpa ta tril

EFECTO PSICOLOGICO:

Contento
Dificultad pa comunica
Sinti superior,
todopoderoso
Energia
No tin precupacion
Halucina; scucha/tende of wak cosnan cu no ta real.

Riesgonan

CORTO PLASO:

Perdida di apetit
Curason ta bati mas liher cu normal
Presion den sanger ta subi
Temperatura di curpa ta subi
Adernan ta bira smal
Pupil ta bira grandi
Insomnia
Mareo
Halucinacion
Euphoria intensivo
Miedo y paranoia
Panico
‘Psychose’

LARGO PLASO

Daño irevocabel di ader nan di orea y celebro, precion halto cu por conduci na un infarto of morto
Daño permanente na higra,riñon y pulom
Dolor fuerte den pecho
Problema di respiracion
Perdida inmenso di peso
Halucinacion
Problema sexual, daño permanentena e organo nan reproductivo y infertilidad.
Desorientacion, cansancio extremo y confusion
Comportacion peligroso
Delirio of ‘Psuchose’
Depresion intense
Adiccion (Incluso despues di un solo uzo)

Embaraso y duna pecho

Cocaina / crack ta pasa rapido via e curpa di e mama pa e placenta y e fetus. Cocaina ta un stimulante hopi fuerte. E ta percura pa e curason barti liher y pa contraccion di ader nan. E efecto nan aki ta pone cu precion den sanger di e mama como e fetus ta subi. E ader nan di un fetus ta hopi fini y delicado, un cambio den precion por tin consecuencianan sumamente peligroso pa e mama como e fetus. Esaki tambe por causa embaraso prematuro.

Influencia riba e crecemento
E contraccion di e ader nan ta conduci na dismunicion di e suministro di sanger y oxigeno pa placenta y e fetus.
Un mal suministro di sanger y oxigeno tin efecto riba e crecemento y desaroyo di e fetus.

Impacto negativo ariba e desaroyo di e sistema di nervio
Ademas cocaina por tin influencia negativo riba e desaroyo di e Sistema di nervio. Ta existi un mayor riesgo di parto prematuro, retraso den crecemento y daño celebral. E baby mayoria biaha ta fayece den e matris pa motibo di retraso den crecemento.

Placenta
E uso di cocaina of crack-basecoke durante embaraso por conduci cu e placenta por los di e boca di matris prematuramente. E consecuencia di esaki ta por ta un aborto spontaneo of un parto prematuro.
Tambe por ocuri abnomalidad nan den e ‘urine weg’ , e curason,cara ,man nan y pia nan y tripa nan.

Cocaina-Crack-basecoke y dunamento di pecho
Cocaina /crack ta pasa pa e criatura atraves di lechi materna. E efecto di cocaine/crack den lechi maternal tin mesun efecto riba e mama como e criatura. Entre otro problema respiratorio,diaree y sacamento. E criatura por bira adicto na cocaina atraves di lechi materna. Pa es motibo ta altamente recomendabel pa no haci uzo di cocaine/crack durante cu ta duna lechi pecho.

Dependencia

E consume di basecoke-crack ta extremadamente adictivo. Hunto cu heroina y nicotina basecoke-crack ta un di e droga nan di mas adictivo. E ‘flash’ ta asina agradabel y cortico y e ‘crash’ ta asina desagradabel cu e uzado kier uza tras di otro.
Adiccion mental na basecocaine-crack ta hopi fuerte. Na momento cu e efecto di e basecocaice-crack termina (despues di 5 minuut) e uzado ta haya mal beis y ta cuminsa irita y ta sinti necesidad di bolbe uza. E ta uza te ora cu e keda extremadamente agota.
E uso di basecoke-crack por haci e uzado dependiente di e droga. E prome dosis ta duna un sentimento placentero intenso. Pero cu un sigiente dosis cu e mesun cantidad di basecocaine-crack e sentimento di placer ta bira menos. Esaki ta haci cu e uzado ta bay uza mas di e droga pa asina e por experimenta e mesun sentimento di placer.

Sintoma di abstenencia na basecoke-crack
Sintoma nan di abstenencia na basecoke-crack na momento cu stop di uza ta depression inmenso, dolor,agotacion,cansancio,temblamento,debilidad y problema pa drumi. E fenomeno nan aki por dura pa un tempo largo. Durante e periodo aki ta surgi un deseo inmenso pa bolbe uza.