Marihuana

Kico ta Marihuana

Marihuana ta un nomber colectivo pa hasj y wiet. Nan ta bin di e mata Cannabis Sativa. Ariba e puntanan di e flor y e blachinan di e mata tin grano. Esaki ta wordo sefta y machika cu na final ta bira e hasj. Ora di laga e puntanan di e flor femenino seca y garna ta haya e wiet. Ora di papia di cannabis ta nifica hasj y wiet. E kimiconan importante y activo den e mata ta THC y CBD.

WIET
Wiet of Marihuana ta nada otro cu puntanan seko di e flor di e mata di cannabis. E ta seco y por varia di color entre shinishi-berde te berde-bruin. Mayoria bes ora ta papia di wiet ta e parti ariba of mey mey di e mata ta wordo uza.

HASJ
Hasj ta e resina puro di e flor di e mata cannabis. Ora di produci hasj ta separa e flor seco completo for di e mata. Esaki ta wordo haci door di laga e mata seca y fria. Despues e mata ta wordo sefta. Tiki tiki e resina ta pasa door di e sefta. Esaki ta wordo ripiti algun biaha. E resina aki ta wordo primi y ora di primi e ta saca un azeta cu ta zorg pa e resina keda pega na otro. Esaki ta bira bruin y esaki nos ta yama hasj.

THC (TetraHydroCannabinol)
THC ta un kimico activo den e cannabis, esaki ta haci un uzado halto of “stoned”.

CBD (Cannabidiol)
CBD tambe ta un kimico activo importante den cannabis. E funcion di e CBD ta pa calma algun efecto di e THC. Un cannabis cu tin menos CBD aden tin e ora un otro funcion cu un cannabis cu tin hopi CBD.

Manera di uzo

Cannabis ta wordo huma mas tanto den un sigaria. Bo ta bruha e hasj of wiet cu tabaco y lora esaki den un sigaria (joint). Otro nomber pa esaki por ta pito of cheiba. Wiet por wordo huma puro tambe, dus sin tabaco. Hasj por wordo huma den un pipa special, bong of chillum. Por come cannabis tambe den cuminda por ehempel den un spacecake. Ora di come ta sinti e efectonan despues di 1 ora y 30 minuut.

 

Kico bo ta sinti?

Cannabis ta ponebo bira halto (“high’). Bo ta bira activo, bo ta cuminsa papia mas y bo ta haya un sintimento cu no tin niun preocupacion. Bo por haya kick di harimento, elevacion di fantasia. Cannabis por pone bo bira droga (‘stoned’) tambe. E por drecha bo beis y e por daña bo beis. Ora bo bay uza na un momento cu bo ta den un beis di depresion, e beis lo bira mas pio.

EFECTONAN FISICO
Bo boca ta seca, bo ta haya kick di comemento. Bo musculonan ta bira debil. Wowonan ta bira cora. Ora di uza un cantidad grandi e por baha bo presion di sanger. Bo ta ripara esaki ora bo bay lanta para diripiente. E presion di sanger lo baha ora bo ta den un posicion drumi.

Riesgo

A CORTO PLASO

Memoria y Concentracion:
Cannabis tin influencia ariba bo memoria, e ‘short term memory’. Bo lo lubida cosnan cu a caba di wordo bisa. Despues di 4 ora cu bo a uza esaki lo drecha bek. Bou di influencia ta dificil pa pone bon atencion. Pesey humamento di marihuana no por wordo combina cu por ehempel trabou of estudio.

Schizofrenia y Psychose:
Cannabis por causa pa un hende haya schizofrenia. Esaki ta un malesa cu por pone un persona bira hopi bruha. Si bo tin personanan den famia cu tin schizofrenia ta consehabel pa no huma marihuana. Uzo di cannabis na un edad hoben por causa depresion.

Cannabis y alcohol:
Ora bo huma marihuana bo lo bay bebe menos alcohol. Pero e chens ta bira mas grandi si pa haya biramento di stoma y cabes ora di combina cannabis y alcohol. E combinacion di cannabis y trafico no ta bay hunto. Bo lo reacciona menos lihe cu normal. Bo comportacion den trafico lo bira hopi malo.

A LARGO PLASO

Pulmon:
E huma di un joint tin dos biaha mas teer aden compara cu un sigaria. Personanan cu ta huma marihuana ta inhala mas profundo y ta wanta e huma mas largo paden. Esey ta pone cu e teer di e joint ta bira 4 biaha mas hopi compara cu un sigaria. E THC lo drenta den bo sistema despues di un par di seconde. No ta necesario e ora ey pa inhala profundo of wanta e huma mas largo paden. Bo slijmvlies den bo pulmon por haya inflamacion. Esaki por causa bronchitis y longemfyseem (malesa unda e blaasnan chikito den bo pulmon ta scheur).

Curason:
THC ta pone e curason bati mas lihe, e curason mester mas oxigeno. Koolmonoxide ta drenta den e sanger door di e humamento. Esaki ta pone cu e sanger ta
transporta menos oxigeno. E curason mester traha mas duro pero e ta haya menos oxigeno. Esaki ta malo y peligroso special pa hendenan cu tin problema di curason of presion halto. Si bo ta huma tabaco cu nicotina e por causa daño na bo adernan.

Memoria y concentracion:
Uzo di hopi marihuana y pa un tempo largo por afecta e memoria. Celebro di un hoben ta desaroya te mas o menos e edad di 24 aña. Si bo cuminsa huma marihuana na edad hoben, e celebro por haya daño permanente.

Marihuana y Salud Mental

Akinan por lesa algun echo di salud mental y marihuana:
• Marihuana por causa anxiedad severo y hasta ataca di panico, specialmente entre personanan inexperencia cu e uzo di marihuana.

• Marihuana ta strobabo pa reacciona liher y tambe ta strobabo pa procesa informacion. E por stroba bo coordinacion motorico. Si bo ta na cas esaki ta menos peligroso pero si bo ta manehando un vehiculo esaki por trece consecuencianan fatal.

• Uzo di marihuana ta asocia cu malesanan psychiatrico incluyendo schizophrenia.

• Marihuana por causa depresion den hende homber y hende muher (18-25 anja). E ta un di e malesanan mas comun pa hoben awendia.

Influencia ariba bo desaroyo personal

Tin hende cu ta uza droga pa lubida problema. Esaki por strobabo desaroya abilidadnan pa yudabo anda cu situacionnan dificil. Bo no ta crece y bay dilanti como persona.

Embaraso y duna pecho

Hende muher cu ta huma marihuana por haya baby cu peso abou y nan baby ta nace chikito. Ora di duna pecho e THC ta drenta den e lechi di mama.

Dependencia

E chens pa bay depende di marihuana lo bin ora e motibo di uzo ta pa lubida problema of por ehempel kita miedo. Bo lo keda cu gana pa haya e efectonan. E ora ey bo lo bira mentalmente dependiente di dje. Bo lo mester mas pa haya e efecto di nobo. Bo ta ripara si cu personanan cu kier ta droga (stoned) tur ora nan lo keda huma marihuana tras di otro pa e efecto no kita. Un persona cu a uza pa tempo largo y a uza hopi lo haya ‘ontwenningsverschijnselen’ na momento cu e stop. E lo sinti intrankil, miedo, lo drumi malo y tin biaha haya mal soño. Esaki por keda pa 14 dia.