Alcohol

 

Kico e ta?

Alcohol (Ethylalcohol of Ethanol) puro ta un likido transparente, sin color, sin smaak. E formula kimico di alchol ta; C3, CH2, OH. Ora di ingesta(inname) ta sinti cu e ta kima. Alcohol ta los op den awa hopi lihe. Alcohol ta pasa door di bo sanger y esaki ta bay lihe pa full bo curpa. Ta produci alcohol door di laga “yeast” traha  riba alimentonan cu tin sucu aden manera: Batata of frutanan .  “Yeast” ta pone cu sucu ta cambia bira Alcohol. Algun ehempel di alimento cu por uza pa traha alcohol ta; grano, batata of druif. Alcohol tambe ta wordo considera un droga. E diferencia ta cu esaki ta un droga legal. Na diferente parti di mundo tin un edad legal cu por consumi alcohol. E ta cuminsa for di 18 aña bay ariba. Tin mas di 100 tipo di alcohol rond mundo y cada alcohol tin un porcentahe. Algun ehempel di bebida alcoholico ta; cerbes, rum, whisky, tequila, champagne, biña. Cada alcohol tambe tin un glas specifico cu por uza y esaki tin di haber cu e porcentahe di alcohol.

Manera di uzo

Alcohol ta wordo bebi. Via bo stoma e alcohol ta yega na bo sanger y via di esaki e ta yega na bo celebro (despues di 10 minuut ta yega bo celebro). Tin ora por tin alcohol den cuminda por ehempel bolo of mangel. E porcentahe di alcohol den cuminda ta asina abou cu bo no ta sinti niun efecto di dje.

Kico bo ta sinti?

Loke bo ta sinti ora bo ta bebe un bebida alcoholico ta depende di varios factor. Di e persona mes, si e ta hende homber of hende muher, su peso, e situacion cu e ta aden y tambe ta depende di e cantidad di alcohol cu ta ser bebi. Aki tin un tabel cu ta mustra cuanto glas pa un hende homber (H) y cuanto pa un hende muher (M) y ki e persona ta sinti. E diferencia entre un hende homber y un hende muher ta cu hende homber tin mas vocht den curpa compara cu un hende muher.

Cantidad di glas	Efecto
1 (M) 1-2 (H)	Aki e persona ta cuminsa sinti su mes emociona, e persona ta papia/comunica mas facil, ta sinti content y relaha. Apetit ta aumenta. Bo pulso y halamento di rosea ta bay mas lihe.
2-5 (M) 3-7 (H)	Emocion y comportacion ta cambia. Bo ta kere cu bo por haci mas, memoria ta cuminsa afecta y no ta corda cosnan lie mas, reaction ta bira mas slow (peliger pa trafico si ta bay maneha vehiculo. Pa hoben cu no tin experiencia cu alcohol y no tin hopi vocht den curpa por venena cu alcohol si yega na 7 glas bebi.
6-9 (M) 8-14 (H)	Control di bo spiernan ta bira menos. Bo ta bira hopi emocional; bo ta hari hari of yora mas lihe of bo ta rabia lihe tambe. Tin chens cu bo cara por bira cora y bo por haya un “ black-out”(siguiente dia bo no ta corda kico a pasa).
10-13 (M) 15-19 (H)	Bo sentido nan ta verdoof; bo no sa mas loke bo ta scucha of bisa. Bo ta tur bruha.
	Chens ta bira hopi grandi cu por bay inconsciente.
	Peliger pa bo curpa cu chens cu por bay den un coma door di demasiado alcohol den bo sistema.

 

Riesgonan 

Corto plaso:

• “Black-out”/ Memoria

Un “black-out” ta nifica cu pa un momento bo no por corda kico a pasa e dia of anochi prome. Esaki ta pasa paso alcohol ta stroba e trabou di e memoria. Informacion nobo no ta wordo procesa y no lo keda corda esaki pa un termino largo. Pa un momento e parti di memoria no ta functiona mane mester ta.

• Inconsciente

Uzo di alcohol por laga un persona bay inconsciente. Esaki por tin consecuencia negativo pa bo curpa. Bo por haci daño na bo organonan, haya problema pa hala rosea y den algun caso por hasta bay den un coma.

• “Ontremming”

E “ontremming” ta sinti dushi pero por ocasiona pelea, comportacion agresivo of relacion sexual sin uzo di proteccion.

• Reaccion slow

E alcohol ta haci un persona ta bay reacciona hopi mas slow cu normal. Den trafico esaki por tin su peliger. E persona lo tin un “tunnelvision”; e no por wak bon mas loke ta sosode links of rechts di dje.

• Soño y Wayaba

Alcohol por laga un persona pega soño mas lihe pero na mesun momento e ta lanta mas trempan y no a sosega mane mester ta. Otro influencia riba bo curpata ; dolor di cabes, sinti marea y ta sinti bo curpa slap.

• Intoxicacion

Si tin demasiado alcohol den sistema/sanger di un persona e por bay inconsciente of te hasta den un coma. Cerca un hoben esaki por pasa hopi mas lihe compara cu un adulto.

Largo plaso

• Celebro

Hopi uzo di alcohol por afecta e celnan den celebro di un persona. Mas glas un persona bebe pa dia mas hopi e daño aki por ta. E alcohol ta kibra/mata e coneccion entre e celnan y esaki tin efecto riba bo memoria, concentracion y pensamento kritiko. Uzo riba un termino largo por tin un efecto mas pisa riba parti di memoria cu por haya “korsakovsyndroom”. Na comienso cosnan cu a caba di sosode no lo por corda esaki y cu tempo no lo por corda nada y lo cuminsa inventa y fantasea pa asina yena e bashi cu no por corda. Cerca hoben e dao por ta mas severo paso nan celebro ainda ta den desaroyo. E parti pa siña, tuma desicion ta wordo afecta hunto cu e memoria.

• Higra/ Cancer

Hopi uzo di alcohol por crea vet na e higra. Esaki por pasa caba si ta bebe hopi alcohol tras di otro den algun dia. Esaki por kita si ta stop na tempo cu uzo di alcohol. Na uzo pa largo tempo por infecta e higra (hepatitis na higra). Si no stop y ta sigi bebe por yega na haya cancer na higra (levercirrose). E daño aki no por drecha mas.

• Peso

Uzo di alcohol por laga un persona bira mas gordo paso e tin caloria den dje. Si ta bay traha “mixdrinks” tin e chens cu lo tin mas caloria. Uzo di alcohol por laga un persona baha di peso tambe y esaki ta pasa paso no lo tin apetit mes. Persona cu tin hopi tempo ta bebe alcohol ta perde e patroon di come y esaki tin su efecto riba bo tripanan.

• Embraso

Uzo di alcohol durante embraso por tin diferente consecuencia; e por haya un abortus (miskraam), baby por nace prematuro, por nace cu problema den desaroyo por ehempel su memoria y inteligencia. Otro riesgo por ta FAS (foetaal alcoholsyndroom). E baby ta nace cu peso abou, craneo mas chikito, problema cu su largura di curpa y defecto na su cara.