Informacion di Adiccion

Adiccion ta un condicion complexo, un enfermedad celebral cu ta manifesta ora di uzo excesivo di un substancia of obhecto a pesar di e consecuencia cu esaki ta trece cune. Personanan cu adiccion tin un enfoke intenso pa uza cierto substancia of obheto manera alcohol, droga of videogames, na e punto cu esaki por tuma nan bida over, nan ta haci uzo di esaki apesar di sa cu e por causa nan daño y trece problema.
Un persona no ta bira adicto di un dia pa otro. E ta un proceso cu por dura lunanan of añanan pa e yega na e nivel cu e persona ta sufri di e malesa di adiccion. Den e caso aki cada persona ta diferente.

Persona cu tin problema cu uzo di substancia tin un manera diferente di pensa, actua y funciona corporal. Cambio den e celebro ta loke ta causa cu e persona tin un antoho intenso pa e substancia of obheto y esaki ta hacie dificil pa e stop.

E adiccion hopi biaha ta cuminsa cu e uzo occasional di un substancia of obheto. Algun hende ta keda na e uzo ocasional pero otro hendenan ta entusiasma y ta cuminsa uza e substancia of obhecto mas y mas. Esaki ta pasa specialmente ora e cuminsa uza alcohol y/of otro droga pa kita un beis of e persona ta sinti su mes harta y/ of cu stress door di diferente problemanan y situacionnan cu ta pasa cune.
E substancianan aki por causa cambionan dañino den con e celebro ta funciona. E cambionan aki por keda pa un periodo largo despues di e efecto inmediato di e substancia – e intoxicasion. Intoxicasion ta e plaser intensivo, trankilidad, aumento den e sentidonan of un haltura causa pa e substancia. E sintomanan di e intoxicasion por varia pa persona.
E persona ta dicidi pa cuminsa uza substancianan cu tin efecto adictivo cu nan. Obviamente e uzo di e substancia adictivonan aki no lo yuda y e mesun beis of stress lo bin bek e siguiente dia of asina e intoxicasion pasa. E persona lo keda purba mas biaha pa e sentimento malo sconde bou di e uzo y esey lo haci cu e persona kier uza e substancia mas y mas biaha. Despues di tempo personanan cu e adiccion aki ta cuminsa crea un tolerancia pa e substancia, cu ta significa cu nan lo mester un cantidad mas hopi pa asina sinti e efecto di e substancia. E curpa di e persona kier of mester mas di e substancia. Si bay stop of baha e uzo, e curpa por protesta y por te hasta bira malo. Esaki ta un di e señalnan cu e persona a cuminsa depende fisicamente y psicologicamente/mentalmente di e substancia.

Persona cu problemanan di adiccion por ta consciente di nan problema pero ta incapaz pa stop maske cu nan kier. E adiccion aki por causa problema di salud, problema cu famia y amistad, problema na trabou y scol.