Hookah
Kico ta hookah?
‘Hookah’ of ‘pipa di awa’ ta un aparato pa huma un tabaco special jama ‘shisha’. E uzo di hookah a cuminsa siglonan atras na India. Asina mes hookah ta birando popular bek bou di e hobenan. Tin por lo menos 200 sorto di sabor di Shisha manera appel, cherry, menta, chuculati, coco, cappuccino y patia. Otro nombernan pa hookah ta narghile, hubble-bubble y goza. Hookah of pipa di awa ta wordo uza den restaurantnan, cafes of na cas.
Manera di uzo
E tabaco ta wordo keinta cu ayudo di carbon, e huma ta pasa dor di un slang via awa y ta wordo filtra pa wordo inhala. E humado por inhala 50 pa 200 biaha na e pipa. Mayoria biaha e uzo di hookag ta sosode den grupo cu un pipa cu ta wordo pasa di persona pa persona. E awa no ta filtra e toxiconan cu tin presente den e shisha. En realidad e huma cu ta sali di e hookah ta contene concentracion mas halto di toxico manera: carbon monoxide, nicotina, tar y metal cu ta mes of mas halto cu esun den un sigaria.
Riesgonan
CORTO PLASO:
Peliger di infeccion:
Hookah ta hopi uza bou di hobenan y hopi biaha e humamento ta sosede den un grupo di persona. Esey kiermen cu e pipa ta pasa di boca pa boca y por pega otro cu bacteria, virus y te asta e malesa di herpes, hepatitis y tuberculosis.
Monoxido di carbon of venenamento pa motibo Monoxido di Carbon
Ora cu ta uza carbon como fuente pa keinta, ta existi un probalidad halto di venenamento pa motibo di e monoxide di carbon. Esaki ta debi cu e carbon no ta wordo kima completo y esaki ta unda cu monoxide di carbon ta wordo libera.
Sintoma di venenamento di monoxide di carbon ta mareo, naucia, color di cabes y perdida di conosimento na corto plaso.
LARGO PLASO:
Problema cardiaco y vascular
Huma atraves di un hookah ta aumenta e riesgo di enfermedad cardiovascular a largo plaso den comparacion cu personanan cu no ta haci uzo di tabaco.
Problema respiratorio
Huma atraves di hookah por provoca dificultad pa hala rosea y provoca tos, pero tambe por ocasiona COPD (Chronic obstructive pulmonary disease) manera bronchitis chronico y longemfyseem. Huma atraves di hookah por conduci na un function pulmunar reduci.
Cancer
E carbon uza pa keinta e tabaco por aumenta e riesgo di cancer, e ta produci un nivel halto di ‘carbon monoxide’, metal y kimiconan cu ta causa cancer. Ora cu e huma di hookah wordo filtra via e awa e ta contene ainda un nivel halto di toxico. E toxico cu tin den e huma di hookah y e tabaco (shisha) ta contene kimiconan cu ta causa cancer di pulmon, blaas y cancer oral.
Otro peliger
E tabaco di hookah ta contente toxiconan cu por plok e adernan y causa problema di curason. Tin substancia den e shisha cu ta drenta e sanger y ta haci cu bo condicion ta bay atras. Bo spiernan, bo organonan y bo cuero ta empeora. Den shisha tin nicotina cu por causa adiccion.
Influencia riba desaroyo personal
Tin un persepcion robes tocante hookah. Hookah ta wordo mira como un alternativa mas ‘safe’ cu sigaria. Esaki ta completamente falso. E concentracion di substancianan canceroso y adictivo cu tin den e mescla di tabaco aki por ta mas halto cu sigraia. Den e sanger di humadonan di hookah a bin resulta cu concentracion di koolmonoxide ta 4 biaha mas halto cu concentracion den sanger di un humado di sigaria. Y e contenido di nicotina den e tabaco di hookah ta mas halto cu e mescla di tabaco den sigaria. Ademas di esaki bo ta inhala tambe metalnan cu ta bin di carbon manera: chroom, kobalt, chumbo y nickel. Hookah por conduci na problema nan mental manera deprecion.
Embaraso y duna pecho
Uzo di hookah (tabaco) durante embaraso por causa cu e baby por nace cu peso mas abou cu lo normal y tambe ta core riesgo pa problemanan respiratorio.
Dependencia
E uzo di hookah cu tabaco ta mesun adictivo cu huma sigaria. Hopi uzado ta pensa cu e kimico nan dañino ta filtra atraves di e huma, pero esaki ta pasa solamente den un porcentahe chikito. Un gran parti di e nicotina ta permanece activo y esaki por causa dependencia/ adiccion.