Heroina

Kico ta Heroina?

Heroina ta wordo traha di morfina, cu ta wordo traha di opium, cu ta un pasta diki bruin cu ta bin di “papaverplant”(papaver somniferum=slaapverwekkend). E mata aki tin un flor color blanco of biña y ta ser haya na Iran, Irak, Colombia, Mexico pa menciona algun. E droga aki ta conoci como un droga cu desolve den awa y zuur. Heroina ta bin den forma di pipitanan color blanco, shinishi of bruin. Heroina ta wordo traha dor di reaccionnan kimico y ta mas fuerte cu morfina. Ora heroina pasa den e proceso aki e ta bira puro. Ora e wordo bendi riba caya e ta wordo mescla cu entre otro cafeina y paracetamol pa baha su pureza ( potencia).

Manera di uzo

Heriona por wordo uza den diferente forma. E forma mas conoci di uzo di heriona ta via un hangua cu ta injecta den bo ader. Aki nan ta pone e droga riba un cuchara y nan ta bruhe por ehempel awa cu nan ta keinta esaki te ora e desolve den likido y nan ta pone den e hangua. Un otro forma cu por uze ta inhalando esaki (Chasing the dragon), nan ta pone e heroina riba un pida foil y keinta esaki y e damp ta wordo inhala via un tubo. Den e forma di huma no ta bin hopi dilanti. Heroina no ta keda pa hopi tempo den sistema di un persona (maximo 8 ora). Si kier haci test di esaki, ta buska pa otro stof mane morfina pa por detecta uzo. Otro stof di e droga aki ta keda 3 te cu 5 dia den sistema.

Kico bo ta sinti?

E efecto cu heroina por duna un persona ta depende di e dosis y con puro esaki ta. Bo por custuma hopi lihe na e droga cu tin como consecuencia cu e efecto ta bira menos compara cu e prome biaha cu a uze. E prome biahanan por sinti dolor di cabes, marea y cu gana di saka pero despues ta cuminsa sinti curpa ta verdoof y esey lo domina mas.

EFECTO FISICO:

  • Palpitacion di curason ta baha
  • Halamento di rosea ta bira mas slow
  • Temperatura di curpa ta baha
  • Pupil di wowo ta bira chikito
  • Apetito sexual ta bira menos
  • Ta haya dificultad pa bay baño door cu movecion di tripa ta baha.
  • Blaas di pishi ta verdoof cu ta hacie dificil pa pishi
  • Hende muher por haya menstruacion inregular

EFECTO PSICOLOGICO:

  • No ta sinti molester di miedo, dolor, tristesa, friu of hamber
  • Sinti relaha y trankil
  • Sentimento satisfactorio/contento
  • E persona por mustra cu e ta pega soño y lanta bek
  • E persona ta bay den su propio mundo (dromerige)

Riesgonan

CORTO PLASO:

Malesa:
Door cu uzo di hangua sushi of di otro hende por wordo infecta cu algun malesa (HIV/Hepatitis B en C) of haya un infeccion.

Overdosis:
E riesgo mas grandi riba corto plaso ta un overdosis. Esaki por pasa ora un persona no ta custuma cu e dosis di heroina y e ta mas fuerte di loke a pensa, si combina esaki cu otro substancia por ehempel alcohol, e sistema inmunulogico ta abou y si ta uza hopi tras di otro.

LARGO PLASO:

Adiccion:
Heroina ta un di e droga cu bo por bira mas adicto na dje. Despues di 3 siman di uzo ya bo curpa fisicamento ta cuminsa sinti e efecto di esaki. Por sinti entre otro; miedo, friu y calor, diarea, sakamento pa menciona algun.

No ta consciente cu tin un enfermedad:
Heroina ta haci cu un persona no lo sinti dolor of lo sinti dolor laat ora tin un efermedad of malesa.

Baby ta nace fisicamento dependiente:
Un baby cu nace di un mama cu a uza heroina durante su embraso por nace ta yora hopi (huilende baby), ta spanta hopi lihe y ta lanta constant for di soño. Tin chens tambe di haya problema den crecemento (desaroyo)

Morto:
E cantidad di morto bou uzado di heroina ta hopi mas halto compara cu otro droga. Apart di overdosis un persona por fayece di complicacion di cancer, cancer na higra, problema cu pulmon y curason.

Embaraso:

Cerca un hende muher cu ta uza heriona e menstruacion por ta inregular of no ta bin mes. E por sali na estado y no sa esaki. Pa ora haya sa ya e lo ta hopi avansa den embraso.