Happy Drinks

E campaña di Happy drinks a cuminsa originalmente na aña 2017 como “Happy Hour” (kibra siman style) pa e “soft opening” di oficina di F.A.D.A. cu tawata situa e tempo eynan na Theresita Center S.N. E meta di e ‘Happy hour’ tawata pa introduci nos oficina nobo y pa mantene contacto cu e grupo di mucha/hoben di e bario di San Nicolas. E grupo di enfoke pa loke ta e ‘happy hour’ ta hobennan di edad di 10 pa 13 aña, klasnan 5 y 6 di scol basico.

Durante di e evento di ‘happy hour’ nos a introduci ‘Happy drinks’ cu ta parce bebida alcoholico/cocktails pero esakinan ta naturalmente sin alcohol. E idea aki a bin for di e buki di receta cu e team di F.A.D.A. a ricibi for di Dr. Lex Lemmers cu ta traha na Trimbos-instituut na Hulanda y tawata un speaker durante un congreso na aña 2015. E campaña aki ta ser haci riba e diaranson prome cu vakantie di pasco grandi, den orario di mainta, na oficina di F.A.D.A, sea na San Nicolas of na Dakota.
Cu tempo e nomber di e campaña a ser adapta y ta uza ‘Happy drinks’ y a adapta e meta tambe. E meta di “Happy drinks’ ta pa duna informacion na nos hobennan door di organisa un actividad unda nan por wak cu alcohol no mester ta presente pa pasa un rato agradabel.
Durante e evento aki, hobennan ta haya e oportunidad pa ser a conoci cu e team di F.A.D.A. y e localidad mas di cerca. Na mesun momento tin tambe diferente actividad cu ta ser prepara pa asina e hobennan por pasa un rato ameno y haya informacion importante cu lo yuda den nan desaroyo y pa ta mas consciente ora di tuma decisionnan.