GHB
Kico ta GHB (gamma-hydroxyboterzuur)?
GHB (gamma-hydroxyboterzuur) ta un narcotica cu antes tabata ser uza den hospitalnan pa anestesia durante operacion. Actualmente GHB no ta ser uza mas na hospitalnan pa motibo di su efecto secundario y modernismo medicinal. E droga ta cay bou di e categoria di calmante (downer). GHB ta wordo traha cu productonan di limpiesa, productonan pa haci tubo y toilet limpi y productonan cu ta uza pa traha plastic. GBH ta un “hard drug” y esaki ta ilegal. E ta wordo uza mas hopi na momento cu tin actividadnan social (club nocturno). GHB por tin un sabor salo pero si esaki wordo tira den sea alcohol of otro bebida e no lo tin niun smaak. Un di e peligernan di e droga aki ta cu tin persona cu ta tira esaki den bebida di otro cu intencionnan malo por ehempel abusa di sexualmente, fisicamente, maltrata of horta.
Manera di Uzo
GHB ta bin den forma di un likido cu por wordo bebi puro of tira den un bebida. Despues di ongeveer 5 pa 30 minuut bo ta cuminsa sinti efecto di e droga. Despues di 30 pa 45 minuut bo ta riba e top di efecto di e droga GHB y e efectonan ta dura 2 pa 3 ora. GHB ta un droga cu ta hopi dificil pa haya sa si un persona a uza esaki paso e ta keda algun ora so den sistema di un hende. Den urina e por wordo detecta te cu 8 ora y den sanger te cu 12 ora.
Kico bo ta sinti?
E efecto cu GHB tin riba un persona por varia y ta depende con hopi di e droga a wordo uza of tira den e bebida. Si e dosis ta abou e efectonan por ta menos y si e dosis ta halto esaki por ta mas.
EFECTO FISICO
• Dolor di cabes
• Marea
• Stoma ta bira/ gana di saka
• Muscolonan ta bira slap
• Temperatura di curpa abou
• Inconsciente
• Temblamento
• Overdosis: halamento di rosea malo, inconsciente y por stop di hala rosea.
EFECTO PSICOLOGICO
• Contento
• Papia mas
• Ta lanta apetit sexual
• Afecta memoria temporal
• Miedo
• Sinti soño
• No por orienta su mes bon
Riesgonan
CORTO PLASO:
Experiencia fastioso:
Aki ta unda un persona por sinti su mes cu gana di saka, e por bira agresivo, e por lubida cosnan y maneha auto bou di influencia di GHB ta similar na un persona cu ta bou influencia di alcohol.
Inconsciente:
Un persona por bay inconsciente ora di uzo di GHB. Esaki por bin door di diferente motibo, sea e dosis ta hopi halto (persona no sa esaki) of e combinacion cu otro substancia ilegal of alcohol. Tin persona cu ta kere cu e dosis di ghb a sali for di su sistema y cu ta haci nan lo uza mas y esaki por haci cu un persona ta bay for di tino cu consecuencia cu e ta perde rosea, e por stik y cu e lo bay te hospital pa esaki. Hopi biaha den casonan asina bo ta depende di otro personanan.
LARGO PLASO:
Adiccion:
GHB ta un droga cu por ta hopi adictivo. Algun siman despues di uzo por cuminsa haya difucultad pa no uza. E curpa di e persona mes ta cuminsa pidi esaki y si no haye e persona ta cuminsa sinti miedo, no por drumi y e su curpa por hasta cuminsa tril.
Daño na bo curpa:
No ta hopi conoci ki daño GHB por causa a largo plaso na curpa di un persona. Loke si por a ripara ta cu persona cu ta uza ghb regularmente ta haya problema cu memoria y concentracion. Siña algo nobo ta bira mas dificil.
Embaraso
No ta conoce te ainda ki efecto uzo di GHB por tin pa un persona cu ta na estado. Si por bisa cu uzando un substancia cu no mester ta den curpa por tin efecto negativo pa e mama y su baby.