Cocaina

Kico ta Cocaina?

Cocaina, tambe coke, ta un puiro blanco manera cristal cu por wordo inhala. E ta un droga stimulante cu ta wordo produci for di mata di coca (Erythroxylon coca), cu ta crece na Sur-America. E blachinan di e mata di cocaina ta contene 0.1 pa 0.9% di cocaina.

 

DIFERENTE TIPO:

Na Sur-America tin hende cu ta kauw e blachinan di e mata di coca te ora e bira manera un pruim. E blachi ta wordo hinca den nan boca y bruha cu calki. Esaki ta duna un tiki sintimento di energia y ta kita hamber.

E blachinan di cocaina ta traha pasta di coca.
Pasta di coca of bazooka ta wordo crea ora produci cocaina. Pasta di cocaina por wordo uza como droga. Esaki ta pasa hopi na Sur-America. Nan ta huma e pasta di coca.
Cocaina ta wordo traha ora di procesa e pasta di coca cu diferente kimiconan te ora e bira puiro.
Esaki ta wordo inhala via nanishi. E ta wordo uza mas tanto na Merca y Europa door di personanan cu ta sali hopi.
Crack/basecrack of cocaina cushina ta wordo traha door di bruha e cocaina den awa y despues mescle cu baking soda of amoniak. Crack/basecrack ta wordo huma. E tin efecto lihe y pisa. Esaki ta wordo uza mayoria biaha door di personanan cu ta uza heroina. Banda di heroina nan ta uza crack tambe. E ta mustra manera un clompi chikito opaca.

 

OTRO NOMBER PA COCAINA:

• Coca
• Coke
• Sneeuw/snow
• Blanco
• Perico
• Blow

 

Manera di uzo

E extracto di e blachi di coca a desaroya originalmente manera un remedi pa dolor. E forma mas uza di Cocaina ta den e forma di inhala atraves di nanishi. Otro forma di uzo tambe ta poniendo e puiro na bo carni di djente. Tin uzado cu ta injecta esaki den nan curpa pa asina e droga wordo absorbi mas lihe den nan curpa, pero esaki ta aumenta e risico di overdosis. Inhala e huma of e vapor ta acelera e absorbacion cu menos riesgo pa bo salud cu inyecta.

  Comienso di efecto Duracion di efecto
Kauw 3 pa 5 minuut 6 pa 8 ora
Inhala 3 minuut 30 minuut
Inyecta 14 seconde 10 minuut
Huma 8 seconde 5 minuut

 

Kico bo ta sinti?

EFECTO FISICO

• Bo curason ta bay bati mas lihe y bo halamento di rosea ta bay mas lihe.
• Bo presion ta subi
• Bo temperatura di curpa ta subi
• Bo pupila di wowo ta bay bira mas grandi
• Bo perduracion ta crese
• Bo mester bai baño cada rato
• Bo nanishi, shelo di boca y carni di djente ta bira doof.
• Bo apetit ta bay

 

PSICOLOGICO

• E uzado ta sinti su mes alegre y exicta
• E uzado ta sinti yen di energia
• E uzado ta sinti cu e por pensa mas bright y mas lihe
• E uzado ta sinti mas sigur di su mes y ta kere cu e por haci tur cos
• E uzado ta haya confiansa y cuminsa papia mas
• Hamber y cansancio ta kita

 

Riesgonan

CORTO PLASO:

Inflamacion di e slijmvlies di nanishi:
Cocaina ta pone e ader bira mas smal. Esey tambe ta pasa den e slijmvlies di nanishi. E celnan no ta haya suficiente sanger y cu esey no ta haya suficiente oxigeno y nutricion. Esaki ta pone cu e splijmvlies por haya inflamacion. Ora esaki pasa e slijmvlies ta produci extra slijm cu ta pone hende haya nanishi cu ta core awa. Inflamacion di slijmvlies por haci hopi dolor. Uzo cronico di cocaina por laga e slijmvlies muri. Door di inhala via nanishi e cocaina por yega na e sinus di cabes cu por causa dolor di cabes y constipacion.


Curason y adernan:

  • Cocaina por stroba e curason di haya suficiente sanger door cu e ta pone e adernan bira mas smal. Na mesun momento e cocaina ta pone cu e batimento di curason y presion di sanger ta subi. E curason mester bay traha extra duro.
  • Celnan di sanger por cuminsa pega na otro y forma clompi. Esaki por pone e ader sera y por causa un ataca di curason.

Relacion sexual:
Ora di uza hopi cocaina ta bira dificil pa haya un ereccion of orgasmo. Uzo cronico por kita e gana di tene relacion sexual por completo.

Alcohol:
Combinacion di alcohol y cocaina

  • Door di e combinacion bo no ta bay sinti e alcohol hopi cu ta pone un persona ta bay bebe mas alcohol cu tabata e intencion.
  • Tur dos ta pone e curason bati mas lihe.
  • E combinacion ta forma un kimico nobo: coca-ethyleen. Esaki ta un extra presion riba e curason y adernan.
  • E higra mester traha extra duro pa saca e alcohol, cocaina y coca-ethyleen. E higra por haya daño door di esaki. Tambe e combinacion por haci e chens mas grandi pa bira adicto.

 

LARGO PLASO:

Cambio di personalidad:
Ora di uza hopi cocaina bo por bira arogante, egoista y un persona impasivo. Esaki ta pone cu bo por haya problema lihe.

Cansancio:
Cocaina ta suprimi cansancio y soño. Un uzador lo sigui y sigui uza. Agotamento y insomnia ta e consecuencianan. Ora e cocaina sali for di bo curpa bo lo sinti bo mes na werki y hopi cansa. Esaki ta hopi biaha e motibo di bay uza di nobo.

Perdida di peso:
Uzo di cocaina ta pone un persona uza extra energia. Na mesun momento eta kita hamber. Esaki ta pone cu e uzador lo baha peso.

Sospecha:
Cocaina ta traha riba e centro di e celebro cu ta regla bo reaccion ora bo spanta. Bou di influencia di cocaina bo por spanta mas hopi cu normal. Bo ta bira sospechoso ariba tur cos. E por laga un persona sinti miedo, jaloers y tambe halucina (paranoia).

Depresion:
Bo nervionan den bo celebro cu ta saca e kimico serotonine ta wordo stimula mas cu normal. Nan ta saca dimas serotonine cu no ta resta nada mas. Esaki ta pone cu bo no ta sinti alegre ni excita. E por keda asina pa lunanan largo cu bo ta sinti down y den depresion te ora e nervio drecha bek.

Adiccion:
Bo ta adicto na e cocaina ora cu:

• Uza mas frecuente y den mayor cantidad cu a plania
• A purba stop minimalisa y stop di uza pero no a logra
• Deseo fuerte pa uza
• Trabou, scol, hogar ta cay atras pa motibo di uzo
• Uzo continuo apesar cu problema ta surgi den relacionnan
• Pa motibo di uzo ta stop cu actividadnan diario, hobby, sport
• Uzo continuo, incluso ora esaki ta trece peliger
• Uzo continuo apesar cu esaki ta trece problemanan fisico y psicologico
• Mester uza un gran cantidad pa asina sinti e efecto.

 

Embaraso y Duna Pecho

Cocaina/Crack ta pasa lihe di e curpa di e mama na e placenta y strit pa e baby.
Cocaina ta un substancia cu ta stimula, e ta zorg pa e curason bati mas lihe. E efecto aki ta ocasiona presion halto pa e mama y e baby. E adernan di e baby ta hopi fragil y fini y presion halto spontanio den e baby por ocasiona un derame celebral prome cu e baby nace.

Cocaina/ crack ta pasa tras di e lechi pecho directo pa e baby. Den e lechi pecho, e cocaina tin mesun efecto riba e mucha cu e mama unda cu por trece problema respiratorio, diarea, sacamento. Si e mama ta un uzado frecuente, e baby por bira adicto tambe na e cocaina atraves di e lechi pecho of durante embaraso.

 

Dependiente

Bo por bira adicto mentalmente na cocaina. Bo ta keda pensa ariba dje y bo no ta disfruta bo mes sin dje. Bo no lo mester mas cocaina pa sinti e efectonan. Custumber di uza of tolerancia di cocaina no lo hunga un rol. Esey por pasa solamente si bo uza hopi cocaina. Si bo purba uza menos of stop di uza bo lo haya ‘ontwenningsverschijnselen’, retiro. Bo lo sinti bo hopi cansa y cay den depresion. Bo no tin energia y bo no lo disfruta bo mes mas. E chens pa bay uza di nobo ta bira grandi.