AmigoDIDI
Kico ta e campaña #AmigoDIDI
AmigoDIDI ta un campaña nacional contra e maneho di un vehiculo di motor bou influencia di alcohol. E campaña aki a inicia oficialmente na 2016, un campaña pa conscientisa e comunidad tocante e peligernan di maneha bou di influencia di alcohol of otro substancianan.
AmigoDIDI ta un iniciativa di F.A.D.A. y Fundacion Zinnia, den colaboracion cu cuerpo policial di Aruba. E idea original ta di e instituto di Trafico Sigur di Belgica. E campaña aki tambe a wordo implementa na Hulanda.
Ken ta AmigoDIDI?
AmigoDIDI ta e persona cu na un evento/fiesta no ta bebe alcohol, pa asina transporta esnan cu si a bebe alcohol pa nan cas sano y salvo. Alcohol tin influencia den bo forma di ta den diferente manera. Pa es motibo conscientemente AmigoDIDI no ta bebe alcohol durante un evento/fiesta.
Kico ta haci e tarea di AmigoDIDI mas dificil?
Esaki ta depende totalmente di e personanan cu bo ta sali cu ne. Ora bo ta cu bo amistadnan of grupo di famia e por ta dificil pa bisa cu bo no ta bay bebe, hende por interpretabo manera un persona laaf of no ‘cool’. No obstante e personanan aki mester ta consciente cu abo ta e persona cu tin cu hiba nan cas despues di un evento/fiesta. Pa es motibo no ta e mesun persona cada biaha mester ta e AmigoDIDI, pero por cambia entre e circulo di amistad.
Kico ley ta stipula?
Limite pa ley di maneha ta menos di 220 ugl/1 liter rosea of 0.5 mgr/ml sanger. Si uza alcohol ta conta lo siguiente: si bo bebe mas cu 2 bebida alcoholico, por ehempel 2 cerbes di 12 ons cu tin 5% di alcohol, 2 glas di biña cu 5% of cu 12% of un shot di un bebida fuerte (1 shotglas di 1.5 ons cu 40%), ya caba bo a surpasa e limite cu ley ta permiti, aunke cu bo no ta sinti bo mes burachi. Despues di cada glas di alcohol bo ta haya e ‘neiging’ (tendencia, gana) di bebe un glas mas. Sin pensa bo ta pasa e limite legal. En principio alcohol ta lagabo sinti mas sigur di bo mes, y bo bista riba cualkier peliger ta bira menos y bo ta durf di tuma mas risico. Juist esaki no ta un bon combinacion den trafico. Alcohol tin influencia riba bo coordinacion, bo conocemento, bo balans y bo abilidad pa pensa racional y cu claridad. Alcohol ta hacibo mas impulsivo y ta pone cu bo kier surpasa limitenan.
Alcohol ta influencia con bo ta maneha auto
Bo ta reacciona ‘slow’
Alcohol ta funciona manera un sedante, e ta verdoof bo celebro. Pa es motibo un persona cu a bebe alcohol ta reacciona mas ‘slow’ cu normal. E control di bo musculonan di man y pia tambe ta bay atras. Si bo mester encontra bo mes den un situacion caminda bo mester primi riba brake of bira e stuurwiel , e chens ta hopi grandi cu bo ta haci esaki mucho laat.
Bo ta wak menos bon
Despues di e uzo di alcohol un persona tin e ‘neiging’ di wak stret dilanti , como sifuera bo ta den un ‘tunnel’. Tin hopi posibilidad cu bo no tin bista riba locual ta sosode banda drechi of robes dibo. Esaki ta haci cu dificilmente bo ta wak un peaton crusa caminda, y pa ora abo logra wak kisas ta mucho laat pa reacciona.
Bo ta concentra hopi malo
Alcohol ta hacibo suf y ta reduci bo concentracion. Den practica ta mustra cu e perdida di concentracion ta extra peligroso ora cu no tin mucho trafico y bo ta pensa cu nada malo por sosode. E resultado ta accidentenan incomprendibel, por ehempel un auto cu ta dal den un palo di mata riba un caminda keto y bashi.